Contra la guerra n'Afganistán [Asturianu]

Vemos con esmolición cómo la guerra n'Afganistán ta faciéndose cada vuelta más sangrina.

Dalgunos intenten presentar la ocupación lliderada polos Estaos Xuníos como una misión de paz y reconstrucción, pero la murnia realidá ye otra.

L'añu pasáu morrieron más civiles afganos qu'en nengún añu dende l'entamu de la ocupación, en 2001.

La mayor parte de los recursos tán destinados a finxos militares, non a la reconstrucción; amás, una parte importante del dineru destináu a la mentada reconstrucción acaba nes manes de multinacionales o de corruptos dirixentes locales impuestos pola ocupación.


Esisten graves llimitaciones a la democracia n'Afganistán, a resultes, ente otres coses, de que ye un país ocupáu. Les recientes elecciones foron universalmente reconocíes como fraudulentes, pero Karzai sigue como presidente.

La situación de les muyeres afganes ye cuasi tan espantible como lo yera cuando gobernaben los talibanes. Karzai aprobó mesmamente una llei que permite que los homes puean violar a les sos esposes, dalgunes de las cuales tienen menos de diez años d'edá.

Asina ye Afganistán tres de más d'ocho años d'ocupación. Nun se pue xustificar el derramamientu de sangre inocente que la población civil afgana ta pagando por mor de la presencia militar estranxera. Esti sufrimientu espárdese a les families de los soldaos ocupantes, que ven cómo la so xente cai nuna guerra d'oxetivos prietos.

Espresamos la nuesa solidaridá col pueblu afganu, y el nuesu deséu de que-y permitan llevantar el so propiu país, ensin la ocupación y ensin los señores de la guerra y narcotraficantes qu'esta conlleva.

Pidimos al Gobiernu qu'anule l'unvíu de tropes y que retire darréu los efectivos qu'anguaño participen na guerra d'Afganistán. Camentamos que'l millón d'euros al día que'l Gobiernu español gasta anguaño na ocupación habría de tar empobináu a fines sociales.

Nesti sen, sopelexamos el nuesu sofitu a la campaña pola retirada de les tropes españoles d'Afganistán y a les movilizaciones contra la guerra qu'ésta entama pal 20 de marzu de 2010.

Robla